Ознаймуем симъ нашим унѣверсалом кождому кому би колвекъ о тому вѣдати належало, а особливе пану полковниковѣ лубенскому, старшинѣ полковой и въсему старшому и меншому того полку товариству, ижъ респектуючи ми на уставичній працѣ п. Яреми Иляшенка, сотника чигириндубровского, котории́ он будучи въ пограничном городѣ всегда чуле и зичливе отправует, надаемо ему до ласки нашой войсковой селце прозиваемое Гусиное, уво уездѣ Чигириндубровскомъ лежачое, позволяючи от людей тамошних посполитих (:кроме Козаков:) отбирати послушенство и повинности ку въспартю домови его потребъ. Зачим мѣти хочем и приказуем, аби ему п. Яремѣ Иляшенковѣ, сотниковѣ чигириндубровскому, нѣхто зъ старшини и черни во въладѣнию того селца жадное не чинил перешкоди. А войтъ селца оного зъ тяглими людми жеби ему во всемъ, якъ слушност несеть, повиновалися. Дан въ Лохвици, року 1695 февраля 3-го.
Звишменованний гетман рукою власною.
Его царскаго пресвѣтлого величества войска Запорозкого обои́х сторон Днѣпра гетман Иоанъ Скоропадский.
Пану полковниковѣ лубенскому пп. старшинѣ его полковой, а особливе п. сотниковѣ чигириндубровскому зъ урадом тамошним, въсему старшому и меншому того полку товариству и посполству, и кождому кому колвекъ о том вѣдати належит, симъ нашим ознаймуем унѣверсаломъ, ижъ презентовала намъ Кирилова Шулудченкова монаршую царскаго пресвѣтлаго величества грамоту и унѣверсал антецесора нашего небожчику свекровѣ еи́ Яремѣ Иляшенку на село прозиваемое Гусиное въ уездѣ Чигириндубровскомъ будучое, данънее, и просила нашего на тое подтверженя. Ми прето гетман, прошению еи́ Кириловой не отрекши, а мѣючи по должности нашой въ предостонѣшом почитаніи́ монаршую царского величества грамоту, яко помянутое село Гусиное зо всѣми до него приналежними gрунтами и угодиями въ свободное заживане симъ нашим ствержаемъ унѣверсалом, позволяючи оной всякие приходячие користи и подданное от посполитих людей отбирати послушенство, такъ аби нѣхто зъ старшини и чернѣ въ спокойном того села владѣнию жадной найменшой ей Кириловой не важился чинити трудности, перепони и перепятия. Войтъ зас предреченного села Гусиного з посполитими людми должен ей якъ державци своему всякое отдавати (:кромѣ Козаков якіе при свои́х волностях повинни найдоватися:) послушенство и абедиенцію, мѣти хочем и рейментарско приказуем. Дан в Глуховѣ, иануария 20, року 1715-го.
Звишменованний гетман рукою власною.
[60] С подлиннимъ [61] сводилъ [61б] писар полковый Савіцкий.
[62] Божіею милостію мы пресвѣтлѣйшіе и державнѣйшіе великіе государи, цари и великіе князи Іоанъ Алексѣевичъ, Петръ Алексѣевич всея Великія и Малія и Бѣлія Росіи́ самодержици
Пожаловали сотника чигириндубровского Ярему Илляшенка, велѣли ему дать сію нашу великихъ государей нашего царского величества жалованную грамоту въ Чигириндубровскимъ уи́зде на селцо прозиваемое Гусиное, для того в нинѣшнемъ въ 203 году, февраля въ 18 денъ, билъ челомъ намъ великимъ государемъ нашему царскому величеству онъ Ярема: въ прошлих де годѣхъ служилъ онъ отцу нашему великихъ государей блаженнія памяти великому государю, царю и великому князю Алексѣю Михайловичу всея Великія
