Року 1570 Морозъ жито поморозилъ въ самые цвѣты и былъ голодъ великій.
Року 1571 Въ лѣтѣ былъ такий морозъ три дни, же все збоже озимое и ярину побилъ; ажъ потомъ отросли потроше и отишли, але велми плохи, такъ, же въ мацу олыцкую по шесть и по семи копъ жита молочено. На другое лѣто по томъ голодѣ былъ моръ великій на Волынѣ, на Подоли и въ Литвѣ, и мало не всюды.
Року 1572 Августъ король умеръ.
Року 1573 Гендрикъ французъ коронованъ у Краковѣ.
Року 1574 Гендрикъ зехалъ съ королевства.
Року 1575 Елекція была у Стенжици. Татаре о святой Покрове Подоле и Волынь по самый Илвовъ и Сокалъ велми звоевали, ижъ вся Полща боялась.
Року 1576 Стефанъ, воевода Седмикгродскій, на кролевство Полское взятъ и коронованъ.
Року 1577 Татаре Дубна добывали. Наши Кгданска добывали; видячи кгданщане, ижъ не оборонитись, доброволне поддались — въ кголдъ стародавный знову поступили. Острополь заложенъ.
Року 1578 Татаре Острога добывали — царь Перекопскій съ царевичи. Подкова, воевода Волошскій, доросши лѣтъ своихъ, низовыхъ козаковъ набравши, Петрыла воеводу Волошского зогналъ, а самъ на воеводствѣ осѣлъ, за што король у Лвовѣ казалъ его стяти.
Року 1579 Полоцко взялъ Стефанъ король съ поляки, и зъ Литвою. Того-же року шелъ дождь все лѣто безъ престани.
Року 1580 Луки Великие наши взяли.
Року 1581 Пскова наши добывали и, не вземши, поеднались.
Року 1582 Папежъ рымскій свята отъ грековъ отделилъ, въ чомъ великое замешане поляковъ зъ Русью учинилъ.
Року 1585 Великая зима и весна сухая, лѣто не рожайное. Тогожъ року Белзъ погорѣлъ въ мясопустъ великій. Тогожъ року князь Василій Острожскій, воевода Кіевскій, Ярославль заложилъ.
Року 1586 Князь Александръ Констентиновичъ, сынъ воеводы Киевского, заложилъ мѣсто и замокъ Браславль.
