или Грьчинъ Русина, да того дѣля грѣха заплатить сьребра литръ 5 по закону Русьскому, аще ли есть неимовитъ, да како можеть, въ толикоже проданъ будеть, яко да и пърты, в нихъже ходить, да и то съ него съняти, а опроче да на роту ходить по своей вѣрѣ, яко не имѣя ничьтоже, ти тако пущенъ будеть. Аще ли хотѣти начьнеть наше цѣсарьство отъ васъ вои на противящаяся намъ, да пишють къ великому кънязю вашему, и посълеть къ намъ, еликоже хощем: и отътолѣ увидять ины страны, каку любъвь имѣють Грьци с Русию1). Мы же съвѣщание се написахомъ па дъвою харатию. и едина хартия есть у цѣсарьства нашего, на неиже есть крьстъ и имена наша написана, а на друзѣи съли ваши и гостие ваши. А отъходяще съ сълъмь цѣсарьства нашего, да допроводять ю къ великому кънязю Русьскому Игореви и къ людьмъ его; и ти, приимающе харатию, на роту йдуть хранити истину, якоже мы съвѣщахомъ и напьсахом на харатию сию, на неиже суть имена наша написана. Мы же, елико насъ крьстилися есмы, кляхомъся цьркъвию святаго ІІлиѣ въ сьборьнѣи цьркъви2) и предълежащьмь чьстьнымь крьстъмь и харатиею сею, хранити вьсе, еже есть написано на ней, ни проступати отъ него ничьтоже, а иже преступить се отъ страны нашея, ли кънязь, ли инъ къто, ли крьщенъ, или не крьщенъ, да не имать помощи отъ Бога, и да будеть рабъ въ сь вѣкъ и въ будущий, и да заколенъ будеть своимь оружиемь. А не крыцении Русь да полагають щиты своя и мечѣ своѣ нагы и обручѣ своѣ и прочая оружия, и да кльнуться о вьсемь, яже суть написана на харатии сеи, хранити отъ Игоря и отъ вьсѣхъ боляръ и отъ вьсѣхъ людии страны Русьскыя, въ прочая лѣта и въину. Аще ли же къто отъ кънязь или отъ людии Русьскыхъ, ли хрьстиянъ, или не хрьстиянъ, преступить се, еже есть писано на харитии сеи, будеть достоинъ своимь оружиемь умрети, и да будеть клятъ отъ Бога и отъ Перуна, яко преступи свою клятъву3). Да обаче будеть добрѣ Игорь великыи кънязь хранити любъвь сию правую, да не раздрушиться, доньдеже сълньце сияеть, и вьсь миръ стоить, въ нынѣшьняя вѣки и въ будущая. Посълании же сълы Игорьмь придоша къ Игореви съ сълы Грьчьскыми, и повѣдаша вься рѣчи цѣсаря Романа. Игорь же призъва сълы Грьчьскыя, и рече имъ; „глаголите, чьто вы казалъ цѣсарь?“ И рѣша съли цѣсареви: „се, посъла ны цѣсарь, радъ есть миру, и хощеть миръ имѣти съ кънязьмь Русьскымь и любъвь; и твои съли водили суть цѣсаря наша ротѣ, и насъ посълаша ротѣ водить тебе и мужъ твоихъ“. И обѣщася Игорь сице сътворити. И наутрия призъва Игорь сълы, и приде на хълмъ, къде стояще Перунъ; и покладоша оружие свое и щиты и злато; и ходи Игорь ротѣ и людие его, елико поганыхъ Руси; а хрьстияную Русь водиша ротѣ въ цьркъви святаго Илиѣ, яже есть надъ Ручаемь, коньць Пасынъчѣ бесѣди: се бо бѣ съборьная цьркы, мънози бо бѣша Варязи и Козаре хрьстияне1).
- ) Кн. руський бере на себе обов'язок взагалі допомагати Грекам в боротобі супроти ворогів.
2) Св. Софіі Костантинопольській. 3) Тут маємо дві присяги: раніше христіянську, потім ідолопоклонську. <) Існування в Киіві 1/2 X в. христіянськоі церкви, та ще соборноі, свідчить, що в той час уже було богато христіян серед руського елементу та тих чужинців, які мешкали у Киіві за для ріжних справ.
