Тоей же зими[1] много жолнѣрства з голоду померло.
В томже року на веснѣ в Бѣлагородѣ громъ розбилъ замокъ, же ажъ в море летѣло камення, которого турки заробити не могли, бо татаръ усѣхъ вигнано з Бѣлагородщини у Кримъ, якъ повернулся[2] даръ турецкій с под Камянца зимою, а которыхъ вигнано, тіе в поляхъ коло Богу померзли,[3] бо не переправили рѣкъ, и много ихъ потонуло, и задля-того того лѣта не ходили татаре у Волоскую землю туркомъ на помочъ. И Сѣрко много того лѣта шкоди починилъ с колмиками в Криму, и в Бѣлородщинѣ попустошилъ, и тие недобойки[4] турецкіе с Камянця уходили на Могилевъ, Стѣну и Рашковъ до Тягинѣ, бо того часу козаки з Дорошенкомъ при Турчину зоставали. Волоская земля того часу в великомъ утрапленню была, же мусѣли усѣ з своеи землѣ утѣкатѣ, и много коло Богу в тихъ городахъ значнихъ[5] волохъ тулялось, бо великую кривду терпѣли от татаръ, которіе зимовали, вигнавши ляховъ и господара Петрецая,[6] а насталъ Думитрашко господаремъ,[7] що з ордою прѣшолъ, который и самъ у татаръ за неволника былъ, бо що хотѣли, тое робили, и брали по самий Дунай, поколя жолнѣре полскіе засягли были.
- ↑ Въ сп. г. Юзефовича: „Въ томъ же року“.
- ↑ Въ изд. г. Бодянскаго и въ сп. Козельскаго: „якъ повернулъ“.
- ↑ Тамъ же: „зимою оныхъ выгнано, которіе въ поляхъ коло Богу померзли“.
- ↑ Въ сп. Козельскаго: „недоборки“.
- ↑ Въ изд. г. Бодянскаго: „знатныхъ“.
- ↑ Тамъ же: „Петрецея“.
- ↑ Тамъ же: „Димитрашенко господарь“.
