гою, пошли противъ его, и тамъ великую битву учинили и кроля Казимера мало не взяли, ажъ на миръ сталъ кроль волати; и то было въ мѣстѣ Зборовѣ и учинили миръ зъ королемъ.
Року 1651 князь Радивилъ до Киева прийшовъ и мѣсто Кіевъ спалилъ, потымъ отъ страху козацкого и самъ мусѣвъ уступити и до Бѣлой церкви ледво умкнулъ при митрополитѣ Косовѣ.
Року 1652 моръ былъ великій по всей Малой Росии, Украинѣ, и Полщи, и Литвѣ.
Року 1654 месеца Іануарія 6 дня гетманъ Богданъ Хмелницкий зъ войскомъ запорозкимъ и вся Украина поддалася цару московскому, Алексѣю Михайловичу.
Тогожъ року Москва въ Кіевъ увошла въ великий постъ.
Тогожъ року месеца Августа 2 дня въ середу о полуднѣ слонце затмилося страшно; было всѣмъ въ барзо великомъ подивеню.
Року 1657 Богданъ Хмелницкій гетманъ умеръ въ Чигринѣ.
Року 1658 Выговского Данилка подъ Кіевомъ на горѣ Шкавицѣ Москва розбила и Кіевъ воевода Шереметъ спаливъ.
Року 1660 ляхи зъ ордою и Юрась Хмелницкий зъ козаками подъ Чудновомъ Шеремета и весь таборъ московский розбили и въ Орду погнали.
Року 1663 месеца Ноемврія 14 преставился Варнава Лебедевичъ, ігуменъ Межигорский, человѣкъ чесный и побожный, общого житія не оспаный ревнитель; былъ погребенъ Іннокентіемъ Кгизелемъ, архимандритомъ почерскимъ и всѣмъ духовенствомъ Кіевскимъ въ монастыру Межигорскомъ, въ церкви великой, Ноеврія 30.
Року 1664 кроль Янъ Казимеръ зъ ляхами и зъ ордою на Заднѣпре ходилъ, але ничого не справилъ.
Року 1665 монастыръ Межигорский згорѣвъ Іюня 25.
Року 1668 гетманъ Бруховецкий цару московскому змѣнилъ и Москву по городамъ казалъ бити.
Року 1671 гетманъ Петро Дорошенко зо всею Украиною поддался цару турецкому.
