а потомъ на зиму шелъ до Берестя, вси войска свои розпустилъ, а самъ въ Берести зимовалъ; и скоро великъ-день минулъ, и онъ, собравши вси свои силы: литовскіи, жомоитскіи и русскіи, и на другой недѣли по велицѣ-дни, поиде на князя Станиславля Кієвскаго; и пришодъ, возметъ городъ Вручей и городъ Житомиръ; и князь Станиславль Кієвскій, обославшися съ княземъ Ольгомъ Переславскимъ, и съ княземъ Романомъ Бранскимъ, и съ княземъ Львомъ Волынскимъ, котораго князь велики Гедыминъ выгналъ зъ Луцка, и собралися вси у великомъ множестви людей своихъ русскихъ, и сподкалися съ княземъ великимъ Гедыминомъ на рѣцѣ на Рпени, подъ Бѣлымъ городомъ, въ шести миляхъ отъ Кієва; и вчинили бой и сѣчу великую; и поможе Богъ великому князю Гедымину, побьеть всихъ князей Русскихъ на голову, и войско ихъ все побитое на мейсцу зостало, и князя Льва Луцкаго и князя Ольга Переяславскаго вбилъ, и въ малѣ дружинѣ Станиславль Кієвскій изъ Романомъ Браньскимъ втекуть до Брянска. А князь великій Гедыминъ оступилъ городъ Бѣлгородъ и горожане, видячи, ижъ господарь ихъ зъ войска побѣгъ, а войско все на голову поражено, и оныи, не хотячи противитися войску такъ великому литовскому, передалился съ городомъ князю Гедымину, и присягу учинили служити къ великому князству Литовскому; и затымъ князь Гедыминъ пошолъ со всѣми силами своими до Кієва. Обляже городъ Кієвъ, и Кіяне почалися єму боронити, и лежаль князь великій Гедыминъ подъ Кієвомъ мѣсяцъ. А за тымъ здумали съ собою горожане Кієвскіе, ижь моцы великаго князя большъ терпиты не могли безъ господара свого, великаго князя Станиславля Кієвскаго, и услышали то, ижь господарь ихъ, князь Станиславль, утекъ отъ Гедымина, и войско все ихъ господаря побито, и въ нихъ зоставы никотороє князь ихъ не зоставилъ; и оны, змовившися одномыслие, подалися великому князю Гедымину; и шедши зъ города со кресты: игумены, попы и діяконы, и ворота городовыя отворили и стретили великого князя Гедымина честно, и вдарили єму чоломъ, и поддалися служити єму, и присягу свою великому князю на томъ дали, и били челомъ, штобы отъ нихъ отчинъ ихъ не отнималъ; и князь Гедыминъ при томъ ихъ зоставилъ, и самъ честно въ городъ Кієвъ въѣхалъ“.
