Сесь учебник содержить в собѣ ґраматичный матеріял III. и IV. клас народноѣ школы.
В II. классѣ подаються лиш назвы имен по внѣшных знаках, их роды и числа, часы и особы глаголо̂в и чисто формальнѣ правила правописаня; все то можеся стати без учебника.
Матеріал подан методично, т. є. кождое правило выводиться з помочію примѣро̂в, взятых из живого, говореного языка и вправляєся практичными задачами.
Таких примѣро̂в и задач учебник подає лиш мало ибо хоче лиш указовати на то, як має учитель из житя шко̂льного и родинного, из житя села и из читанки выберати для себе дальший конкретный матеріял.
Книжочка сеся є IV. выданєм Ґраматики моєѣ, написаноѣ 1898. р., другий раз выданоѣ р. 1919., a третий раз р. 1923.
Правопись учебника є етимолоґична, приспособлена ко приписам новійшоѣ филолоґіѣ и постановленям анкеты Школьного Оддѣла.
Прошу пано̂в коллеґо̂в, чтобы своими практичными примѣтками помагали менѣ: недостатки сего учебника доповнити и слѣдуючоє выданє єще лѣпшим сдѣлати.
Ужгород, 15. VII. 1924.
А. Волошин.
