ховскимъ не дали съ онимъ с̾купити, того Сулимку под Бѣлою Церквою розгромили, где и Сулимка згинулъ, а напотомъ и Виговского взяли, которого Маховскій полковникъ казалъ ростриляти, недбаючи, же воеводою былъ. Итакъ Виговского гетманство скончилося. Того жъ року и метрополита Дионисій[1] Балабанъ в Корсуню померлъ, а на его мѣсце обрано Іосифа Тукалского; але и тамъ нещирость[2] была, бо на метрополію садился Антоній Виннѣцкій, которого руку держалъ гетманъ Тетера, а иншое духовенство и шляхта отца Тукалского руку держали; але перемоглъ гетманъ Тетера, бо удалъ до короля его милости отца метрополиту Тукалского и своего шваgра Хмелницкого, бившого гетмана, такъже и Гуляницкого, боячися гетманства стратити; которихъ король казалъ побрати и на заточение послати до Малборку, мѣста в Прусахъ, где роковъ два сидѣли у вязенню.
Того жъ року 1664[3], заразъ по Воскресеніи Христовомъ, гетманъ Бруховецкій скупилъ усѣ полки заднѣпрскіе, и маючи з собою килка тисячей москви, рушилъ спод Переясловля ку Черкаскому[4]. О чомъ почувши гетманъ Тетера, а видячи незичливость противко собѣ козацкую и усѣхъ людей, забравши усѣ скарби гойсковіе, що старий Хмелницкий збиравъ и инніе гетмани, и клейноти войсковіе. стада и товари, вишолъ з Чигирина до Браславля, зовсѣмъ провадился з женою,[5] а напотомъ видячи, же юже уся Украина противко нему бунтуется, и сподѣваючися на ласку королевскую,