Азъ іерей Семеонъ Коростенский, на той часъ будучи намѣсникъ Добромилски при церкви Рождества Пречистои Дѣвы, на тоижъ церкви сукцесоромъ, тое списалъ, що ся за моего живота дѣяло въ которыхъ лѣтехъ. Почавши отъ року 1648 козацкая война изъ гетманомъ Хмелницкимъ — звоевали по самый Люблинъ.
Року 1649 выляня водъ было барзо велико, же села, дворы, замки ломило.
Року 1651 былъ голодъ барзо велики: жито было по злотыхъ 10, пшениця 12.
Року 1652 повѣтря было по вшистъку Полщи.
Року 1653 попустилъ былъ Господь Богъ звѣря лютого, который люди поидалъ.
Року 1655 знову козаци изъ Москвою Полще воевали, которые и церкви руйновали и свещенниковъ у церквахъ пекли.
Року 1656 Шведове по сами Перемышль звоевали.
Року 1657 по Рождествѣ Христовомъ вуйна Венgерская; с козаками по самий Краковъ звоевали.
Року 1672 Турци Каменецъ Подулски взяли; татарове по самую Вислу спустошили, людий въ неволю побрали.
Року 1674 Поляци въ Хотѣню Турковъ выбили. Бъ тымъ же року голодъ барзо великий былъ: жито было по золотыхъ 14; пшениця по 15; людий барзо сила померло.
Року 1673 Цесаръ турецъкий зе вшистковъ потуговъ Украину бурилъ; Умань и иншии мѣста Украинскии мечомъ і огномъ воевалъ.
Року 1675 Абраамъ баша Збаразски замок изъ фундаменту и Подгайцѣ и инъшии мѣста спустошилъ.
