Нарис української історіографії. Джерелознавство/IV. Уривки з галицько-волинського зводу

Матеріал з Вікіджерел

Уривки з галицько-волинського зводу.
№ 1. Як збудовано місто Холм[1].

Холмъ бо городъ сице бысть созданъ: Божиимъ веленьемъ, Данилови бо княжащу во Володимѣрѣ, созда градъ Угорескь и постави во немь пискупа. Яздящу же ему по полю и ловы дѣющу, и видѣ мѣсто красно и лѣсно на горѣ, обьходящу округъ его полю, и вопраша тоземѣць: «како именуеться мѣсто се?» Они же рекоша: «Холмъ ему имя есть». И возлюбивъ мѣсто то и помысли, да сожижеть на немь градець малъ; обѣщася Богу и святому Ивану Златоусту, да створить во имя его церковь. И створи градѣць малъ, и видѣвъ же яко Богъ помощникъ ему и Іоанъ спѣшникъ ему есть, и созда градъ иный, его же Татарове не возмогоша прияти, егда Батый всю землю Рускую поима; тогда и церковь святой Троицѣ зажьжена бысть, и пакы создана бысть. Видивъ же се князь Данило, яко Богу поспѣвающу мѣсту тому, нача призывати прихожаѣ Нѣмцѣ и Русь, иноязычникы и Ляхы; идяху день и во день, и уноты и мастерѣ всяции бѣжаху ис Татаръ, сѣдѣлници, и лучници, и тулници, и кузницѣ желѣзу и мѣди и сребру; и бѣ жизнь, и наполниша дворы, окрестъ града поле и села. Созда же церковь святого Ивана, красну и лѣпу: зданье же еѣ сице бысть: комары 4, с каждого угла преводъ, и стоянье ихъ на четырехъ головахъ человѣцскихъ изваяно отъ нѣкоего хытрѣца; окна 3 украшена стеклы Римьскими; входящи во олтарь стояста два столпа отъ цѣла камени, и на нею комара, и выспрь же вѣрхъ украшенъ звѣздами златыми на лазурѣ; внутрьнии же еи помостъ бѣ слитъ отъ мѣди и отъ олова чиста, яко блещатися яко зерцалу; двѣри же еи двоя украшены каменьемь Галичкымъ бѣлымъ и зеленымъ Холмъскымъ, тесанымъ, изрыты некимь хытрѣцемь Авдьемь, прилѣпы отъ всѣхъ шаровъ и злата, на преди ихъже бѣ издѣланъ Спасъ, а на полунощныхъ святый Иванъ, якоже всимъ зрящимъ дивитися бѣ; украси же иконы, еже принесе ис Кыева, каменьемь драгымъ и бисеромъ златымъ: Спаса и пречистое Богородицѣ, иже ему сестра Федора вда, из монастыря Федора иконы же принесе, изо Уручего Устрѣтенье, отъ отца его, диву подобны, яже погорѣша во церкви святаго Ивана, одинъ Михаилъ остася чюдныхъ тѣхъ иконъ; и колоколы принесе ис Кыева, другия ту солье: то все огнь попали. Вежа же средѣ города высока, якоже бити с нея окрестъ града, подсздана каменьемь въ высоту 15 лакотъ, создана же сама древомъ тесанымъ и убѣлена яко сыръ, свѣтящися на всеи стороны; стюденѣць, рекомый кладязь, близъ ея бѣ, сажений имущи 35; храмѣ прекраснии и медъ отъ огня яко смола ползущь: посади же садъ красенъ, и созда церковь святыма Безмѣздникома Кузмѣ и Деміана во честь, имать 4 столпы отъ цѣла камени истесанаго держаща вѣрхъ, с тѣхъ же другыи, и в олтарь пресвятого Дмитрея стоить же ти предъ бочными двѣрми красенъ, принесенъ издалеча; стоить же столпъ поприще отъ города камень, а на немь орелъ камень изваянъ, высота же камени десяти лакотъ, с головами же и с подножьками 12 лакотъ. Увидивъ же сицю пагубу граду, вшедъ во церковь и видѣ пагубу и сжалиси велми, помолився Богу, паки обнови и церковь освяти, пискупомъ Иваномъ и паки помолився Богу и созда и свьржьша и высша; вежь же такое невозможе создати: бѣ бо грады иныя зиждай, противу безбожнымъ Татаромъ, за то не созда ея.

Въ лѣто 6768. Созда же церковь привелику во градѣ Холмѣ, во имя пресвятыя Приснодѣвыя Мария, величествомъ и красотою не мене сущихъ древнихъ, и украси ю пречюдными иконами; принесе же чашю отъ земля Угорьскыя мрамора багряна, изваяну мудростью чюдну, и змьевы главы бѣша округъ ея, и постави ю пре(дъ) двѣрми церковьными, нарѣцаемыми царскыми; створи же в неи крестилницю крестити воду на святое Богоявление; створи же в ней блаженый пискупъ Иванъ отъ древа красна точенъ и позлащень днѣ и внѣ, дивлению подобенъ.

№ 2. «Князя Володимеря рукописаніе»[2].

Во имя Отца и Сына и Святаго Духа. Молитвами святыа Богородица и Приснодѣвица Марья и святыхъ ангелъ. Се язъ князь Володимеръ, сынъ Василковъ, внукъ Романовъ, даю землю свою всю и городы, по своемь животѣ, брату своему Мьстиславу, и столный свой городъ Володимеръ; другую же грамоту напсахъ брату своему такую же; хочю и еще и княгинѣ своей псати грамоту такую же.

Въ имя Отца и Сына и святаго Духа. Молитвами святыа Богородица и Приснодѣвица Марья, святыхъ ангелъ. Се язъ князь Володимѣръ, сынъ Василковъ, внукъ Романовъ, пишу грамоту: далъ есмь княгинѣ своей, по своемь животѣ, городъ свой Кобрынь, и с людми и з данью, како при мнѣ даяли, тако и по мнѣ ать дають княгинѣ моей. Иже далъ есмь ей село свое Городелъ, и с мытомъ, а людье како то на мя страдалѣ, тако и на княгиню мою по моемь животѣ; аже будеть князю городъ рубити, и ни к городу, а поборомъ и Тотарьщиною ко князю. А Садовое и Сомино же даль есмь княгинѣ свое(й), и манастырь свой Апостолы же создахъ и своею силою. А село есмь купилъ Березовичѣ у (Ю)рьевича у Давыдовича Фодорка, а далъ есмь на немь 50 гривень кунъ, 5 локоть скорлата да бронѣ дощатые: а тое село далъ есмь ко Апостоломъ же. А княгини моа, по моемь животѣ, оже восхочеть в черницѣ пойти, пойдеть; аже не восхочеть ити, а како ей любо, мнѣ не воставши смотрить, что кто иметь чинити по моемь животѣ.

№ 3. Хвороба Володимира Васильковича[3].

Князю же Володимеру Васильковичю великому лежащу в болести своей полно 4 лѣта, болезнь же его сице скажемь: Нача ему гнити исподняя устна, первого лѣта мало, на другое и на третьее болма нача гнити. И еще же ему не вельми болну, но ходяшеть и ѣздяшеть на конѣ, и розда убогымъ имѣние свое все: золото и серебро, и камение дорогое, и поясы золотыи отца своего и серебряные, и свое, иже бяше по отци своемь стяжалъ, все розда; и блюда великаа сребрянаа, и кубькы золотые и серебряные, самъ передъ своима очима поби и полья в гривны, и мониста великая золотая бабы своей и матери своей все полья, и розъсла милостыню по всей земли; и стада роздая убогымъ людемь, у кого то коний нѣтуть и тѣмь, ижо кто погибли в Телебузину рать.

№ 4. Характеристика Володимира Васильковича[4].

Княгини же его беспрестани плакашеся, предстоящи у гроба, слезы отъ себе изливающи аки воду, сице вопиюще, глаголюще: «царю мой благый, кроткый, смиреный, правдивый! воистину наречено бысть тобѣ имя во крещеньи Иванъ, всею добродѣтелью подобенъ есь ему: многыа досады приимъ отъ своихъ сродникъ, не видѣхъ тя, господине мой, николиже противу ихъ злу никоторого же зла воздающа, но на Бозѣ вся покладывая провожаше. Наипаче же плакахуся по немь лѣпшии мужи Володимерьстии, рекуче: «добро бы ны, господине, с тобою умрети, створшему толикую свободу, якоже и дѣдъ твой Романъ свободилъ бяшеть отъ всихъ обидъ; ты же бяше, господине, сему поревновалъ и наслѣдилъ путь дѣда своего; нынѣ же, господине, уже ктому не можемь тебе зрѣти, уже бо солнце наше зайде ны и во обидѣ всѣмъ остахомъ; и тако плакавшеся над(ъ) нимь все множество Володимерцевъ, мужи и жены и дѣти. Нѣмци, и Сурожьцѣ, и Новгородци, и Жидове плакахуся аки и во взятье Иерусалиму, егда ведяхуть я во полонъ Вавилоньский, и нищии и убозии, и черноризци и черници: бѣ бо милостивъ на вся нищая. Сий же благовѣрный князь Володимѣрь возрастомь бѣ высокъ, плечима великь, лицемь красенъ, волосы имѣя желты кудрявы, бороду стригый, рукы же имѣя красны и ногы; рѣчь же бяшеть в немь тольста и устна исподняя дебела, глаголаше ясно отъ книгъ, зане бысть философъ великъ, и ловець хитръ, хороборъ, кротокъ, смиренъ, незлобивъ, правдивъ, не мьздоимѣць, не лживъ, татьбы ненавидяше, питья же не пи отъ воздраста своего. Любовь же имѣяше ко всимъ, паче же и ко братьи своей, во хрестьномъ же целованьи стояше со всею правдою истиньною, нелицемѣрною; страха же Божия наполнень, паче же милостыни прилежаше, манастырѣ набдя, черньцѣ утѣшаа и вси игуменѣ любовью приимая, и манастырѣ многи созда, на всь церковный чинъ и на церьковникы отверзлъ ему бяшеть Богъ сердце и очи: иже не помрачи своего ума пьяньствомъ, кормитель бо бяшеть черньцемь и черницамъ и убогимъ, и всякому чину яко возлюбленый отець бящеть, паче милостынею бяше милостивъ.

№ 5. Будівнича діяльність Володимира Васильковича[5].
Князь же Володимеръ, въ княженіи своемъ, многы городы зруби, по отци своемъ: зруби Берестій и за Берестіемъ зруби городъ на пустомъ мѣстѣ, нарицаемѣмъ Льстнѣ, и нарече имя ему Каменець, зане бысть камена земля. Създа же въ немъ столпъ камень, высотою 17 сажней, подобенъ удивленію всѣмъ зрящимъ на нь; и церковъ постави Благовѣщеніа святыа Богородица, и украси ю иконами златыми, и съсуды скова служебныа сребрены, і еуангеліе опракосъ оковано сребромъ, апостолъ опакосъ, и парамья, и съборникъ отца своего туто жъ положи, и крестъ въздвизалный положи. Такоже и у Бѣлску поустрои церковъ иконами и книгами. У Володимери же списа Святаго Дмитреа всего, и съсуды служебные сребряные скова, и икону пречистыа Богородица окова сребромъ с каменіемъ дорогымъ, и завѣсы золотомъ шиты, а другые оксамитные съ дробницею, и всѣми узорочіи украсі ю. У епископъи же у Святоа Богородица образъ Спаса великаго онова сребромъ и да Святой Богородици, и апостолъ списа опракосъ, Святой Богородици да, и съсуды служебные жьженого золота с каменіемь драгымъ Богородици же да, образъ Спасовъ оковавъ золотомъ съ драгымъ каменіемъ постави у Святоа Богородица, въ память събѣ. Въ манастырь въ свой Апостолы да еуангеліе опракосъ, и апостолъ самъ списавъ, и съборникъ великый отца своего тутоже положи, и крестъ въздвизалный и молитвеникъ да. Въ епископью Перемышльскую да еуангеліе опракосъ, окованно сребромъ с женчюгомъ, самъ же съписалъ бяше; а до Чернѣгова пославъ въ епископью еуангеліе опракосъ золотомъ писано, а окованно сребромъ съ женчюгомъ, и среди его Спаса с финиптомъ; въ Луцкую епископью да крестъ великъ сребрянъ позлотисть, съ честнымъ древомъ. Созда же и церкви многы: в Любомли же постави церковъ каменну святого и великого мученика Христова Георгіа, украсі ю иконами коваными, и съсуды служебные сребряны скова, и платци ксамитны шиты золотомъ съ женчюгомъ, херувимъ и серафимъ, и иньдитья золотомъ шита вся, а другаа паволокы бѣлчатое, а в малою олтару обѣ иньдитьи бѣлчатое же паволокы; еуангеліе списа опракосъ, окова е все золотомъ и каменіемь дорогымъ съ женчюгомъ, и деисусь на немъ скованъ отъ злата, цяты великы съ финиптомъ, чюдно видѣніемъ, а другое еуангеліе опракосъ же волочено оловиромъ, и цяту възложи на не с финиптомъ, а а на ней святаа мученика Глѣбъ и Борисъ, апостолъ опракосъ, прологы сниса 12 мѣсяца, изложено житіа святыхъ отецъ и дѣаніа святыхъ мученикь, како вѣнчашася своею кръвію за Христа, и мѣней 12 списа, и тріоди, и охтай, и ермолой, списа же и служебникъ святому Георгію, и молитвы вечерніи и утрьніи списа, особь молитвеника; молитвенникъ же купилъ въ протопопиное и да на немъ 8 гривенъ кунъ, и да святому Георгію; кадилници двѣ; одина сребрена, а другаа мѣденаа, и крестъ въздвизалный да святому Георгію; икону же списа на золотѣ намѣстную святого Георгіа, и гривну златую възложи на нь съ женчюгомъ; и святую Богородицю списа на золотѣ же намѣстную, и възложи на ню монисто золото с каменіемъ дорогымъ; и двери соліа мѣдяные; почалъ же бяше писати ю и списа всѣ три олтарѣ, и шія вся съписана бысть, но не скончана, зайде бо и болѣсть; поліа же и колоколы дивны слышаніемь, такыхъ же не бысть въ всей земли. В Берестіи же създа стлъпь каменъ, высотою яко и Каменецкый; постави же и церковъ святого Петра, и еуангеліе да опракосъ оковано сребромъ, и служебные съсуды скованы сребрены, и кадилница сребрена, и крестъ въздвизалный туто положи; и инаа многаа добродѣяніа съдѣа въ животѣ своемъ, яже словуть по всѣмъ землямъ. Туто же положимъ конецъ Вълодимерову княженію.
№ 6. Встановлення ловчого для м. Берестя[6].

Мьстиславъ же пребывъ мало дний в Берестьи, и ѣха до Каменца и до Бѣльска, и ради быша ему вси людье; утвердивъ людий, засаду посади в Бѣльски и в Каменци, и приѣха в Берестий и рече бояромъ своимъ: «есть ли ловчии здѣ»? Они же рекоша: «нетуть, господине, изъвѣка». Мьстиславъ же рече: «язъ пакъ уставливаю на нѣ ловчее, за ихъ коромолу, абы ми не зрѣти на ихъ кровь»; и повелѣ писцю своему писати грамоту: Се азъ князь Мьстиславъ, сынъ королевъ, внукъ Романовъ, уставляю ловчее на Берестьаны и в вѣкы, за ихъ коромолу: со ста по двѣ лукнѣ меду, а по двѣ овцѣ, а по пятинадесять десяткъвъ лну, а по сту хлѣбовъ, а по пяти цебровъ овса, а по пяти цебровъ пяти цебровъ ржи, а по 20 куръ; а потолку со всякого ста; а на горожанахъ 4 гривны кунъ; а хто мое слово порушить, а станеть со мною передъ Богомъ. А вопсалъ есмь въ лѣтописѣць коромолу ихъ.





——————

  1. Ibidem, стор. 558–560.
  2. Ibidem, стор. 594–595.
  3. Ibidem, стор. 601.
  4. Ibidem, стор. 604–605.
  5. Ibidem, стор. 608–610.
  6. Ibidem, стор. 613.