судити Никона. При которихъ патриярхахъ соборъ билъ на Москвѣ, и на томъ соборѣ патриарху московского зложили з патрияршества в простіе чернци и в заточеніе послали, а на его мѣсце иншого патриярху посвятили. Але жадной ереси на патриярху не показалось, тилко з ненавести тое учинили бояре, и послѣ того великая стала мешанина на Москвѣ.
Того жъ часу нѣякийсь[1] Стенка Разинъ[2] з Дону поднялся с козаками своеволними[3] и пойшолъ на Хвалинское море и тамъ прибралъ много своеволѣ и по городахъ воеводъ мордовалъ, а людей посполитихъ собѣ приворочалъ, ажъ і Астрахань узялъ. На которого по-килка кротъ посилали и нѣчого оному радити не могли, же стрелци до него на тую[4] своеволю приставали. Которій през[5] килка лѣтъ тое робилъ, поколя оного зрадою узято, якъ уже повернулъ ку Дону, и на Москвѣ оного чвертовано[6].
Того жъ лѣта фортелемъ своимъ Дорошенко подхожовалъ Бруховецкому, маючи собѣ способного и помочного метрополиту, которій през чернца[7] Пивского намѣсника, Якубенка, оного такъ писмами, якъ и словесно, обецуючи Бруховецкому цале[8] уступити гетманства усего, тилко жеби вкупѣ зоставало козацтво; чому повѣривши, Бруховецкій гетманъ далъ ся намовити и почалъ брати ненависть на Москву.
- ↑ Въ изданіи г. Бодянскаго: „якійсь“.
- ↑ Въ сп. г. Юзефовича и въ изд. г. Бодянскаго: „Рагожинъ“.
- ↑ Тамъ же: „с военними“.
- ↑ Тамъ же: „в тую“.
- ↑ Тамъ же, какъ въ этомъ мѣстѣ, такъ и всегда почти, вм. „през“ употребляется „чрезъ“.
- ↑ Въ изд. г. Бодянскаго: „и на Москвѣ четвертовано“.
- ↑ Тамъ же и въ сп. г. Юзефовича: „презъ ченца“.
- ↑ Слова „цале“ нѣтъ въ изд. Бодянскаго.
