го узяли. И такъ самъ князь оборонною рукою уступилъ до Путивля, которому болшей жадной шкоди татаре и козаки не могли учинити; и наступила стужа, же юже не пора военная. Запорожцѣ з ордами повернули в Кримъ, а Григорій, видячи, же юже приходятъ до згоди знову заднѣпряне з Москвою, уступилъ з войсками своими ку Каневу, и юже безпечнѣй почалъ Многогрѣшній трактовати з Москвою.
Демко Многогрѣшній, будучи наказнимъ гетманомъ от Дорошенка на тое поставленъ, же онъ найпершей отступилъ от Бруховецкого, здрадивши[1] его, а хочай Бруховецкий марне згинувъ, на тое не уважаючи, жеби и его тое не споткало, себѣ гетманства жичачій,[2] — назбиралъ компанѣи з литви, ляховъ и иннихъ не мало, жеби оному зичливими били, и изобравши усю старшину поблиз себе заднѣпрскую до Новгородка, и приказалъ онимъ, жеби собѣ цалого гетмана настановили, несподѣваючися на оборону гетмана Дорошенка. Що старшина, будучи у дворѣ зачинени, которыхъ было[3] омаль, а при Многогрѣшномъ немало его компанѣи, и боячися, що болше мовити, але пошовши гуртомъ, просили его Многогрѣшнаго, жеби онъ над ними гетманомъ былъ, чего онъ отмовлявся якъ старая дѣвка хорошого жениха; бо того самъ потребовалъ[4] и позволився на тое; которому и присягу виконали на послушенство. И такъ зараз пословъ своихъ до его царского величества послалъ, просячи, жеби знову при-
