Нарис української історіографії. Джерелознавство/III. Уривки з «Повѣсти временныхъ лѣтъ»

Матеріал з Вікіджерел

Уривки з „Повѣсти временныхъ лѣтъ“.
№ 1. Розселення слов'яно-руських племін[1].

…Такоже и ти Словѣне, прешьдъше, сѣдоша по Дънѣпру, и нарекошася Поляне, а друзии Древляне, зане сѣдоша въ лѣсѣхъ; а друзии сѣдоша межю Припетию и Двиною, и нарекошася Дрьгъвичи; ини сѣдоша на Двине, и нарекошася Полочане рѣчькы ради, яже вътечеть въ Двину, именьмь Полота, отъ сея прозъвашася Полочане; Словѣне же, прешьдъше съ Дуная, сѣдоша около езера Илмеря, и прозъвашася своимь именьмь, и съдѣлаша градъ, и нарекоша и Новъгородъ; а друзии сѣдоша по Деснѣ и по Семи и по Сулѣ, и нарекошася Сѣверъ. И тако разидеся Словѣньскыи языкъ; тѣмь же и грамота прозъвася Словѣньская.

Полямъ же живъшемъ о собѣ, и владѣющемъ роды своими, иже и до сея братия бяху Поляне, и живяху къжьдо съ своимь родъмь на своихъ мѣстѣхъ, владѣюще къжьдо родъмь своимь. И быша 3 братия, единому имя Кыи, а другому Щекъ, а третиему Хоривъ, а сестра ихъ Лыбедь. И сѣдяше Кыи на горѣ, идеже нынѣ увозъ Боричевъ, а Щекъ сѣдяще на горѣ, идеже нынѣ зоветься Щековица, а Хоривъ на третиеи горь, отъ негоже прозъвася Хоривица. И сътвориша градъкъ въ имя брата своего старѣишаго, и нарекоша имя ему Кыевъ. И бяше около града лѣсъ и боръ великь, и бяху ловяще звѣрь; и бяху мужи мудри и съмысльни, и нарицахуся Поляне, отъ нихъже суть Поляне Кыевѣ и до сего дьне.

И по сихъ братии дьржати почаша родь ихъ къняжение въ Поляхъ, а въ Деревляхъ свое; а Дрьгъвичи свое, а Словѣне свое Новѣгородѣ, а другое на Полотѣ, иже и Полочане, отъ нихъже и Кривичи, иже сѣдять на вьрхъ Вългы и на вьрхъ Двины и на вьрхъ Дънѣпра, ихъже градъ есть Смольньскъ; туда бо сѣдять Кривичи; таже Сѣверъ отъ нихъ. А на Бѣлѣозерѣ сѣдять Вьсь, а на Ростовьстѣмь озерѣ Меря, а на Клѣщинѣ озерѣ Меря же. А по Оцѣ-рѣцѣ, къде вътечеть въ Вългу, языкъ свои Мурома, и Черемись свои языкъ, и Мърдва свои языкъ. Се бо тъкъмо Словѣньскъ языкъ въ Руси: Поляне, Древляне, Новъгородьци, Полочане, Дрьгъвичи, Сѣверъ, Бужане, зане сѣдоша по Бугу, послѣже же Велыняне. А се суть инии языци, иже дань дають Руси: Чюдь, Меря, Вьсь, Мурома, Черемись, Мърдва, Пьрмь, Печера, Ямь, Литъва, Зимѣгола, Кърсь, Норома, Либь; си суть свои языкъ имуще, отъ колѣна Афетова, иже живуть на странахъ полунощьныхъ.

Полямъ же живущемъ особѣ, якоже рекохомъ сущемъ отъ рода Словѣньска, и нарекошася Поляне, а Древляне отъ Словѣнъ же, и нарекошася Древляне; Радимичи же и Вятичи отъ Ляховъ. Бяста бо дъва брата въ Лясѣхъ, Радимъ, а другыи Вятъко; и прешьдъша, сѣдоста: Радимъ на Съжю, и прозъвашася Радимици, а Вятъко сѣде съ родъмь своимь по Оцѣ, отъ негоже прозъвашася Вятичи. И живяху въ мирѣ Поляне и Древляне и Съверъ и Радимичи и Вятичи и Хървати. Дулѣби же живяху по Бъгу, къде нынѣ Велыняне, а Уличи и Тиверьци сѣдяху по Дънѣстру, и присѣдяху къ Дунаеви. И бѣ мъножьство ихъ: сѣдяху бо преже по Бъгу и по Дънѣпру оли до моря, и суть гради ихъ и до сего дьне, да то ся зъваху отъ Грькъ „Великая Скуѳь“.

№ 2. Варязький шлях[2].

Полямъ же живъшемъ особѣ по горамъ симъ, бѣ путь из Варягъ въ Грькы и из Грькъ по Дънѣпру, и вьрхъ Дънѣпра волокъ до Ловоти, и по Ловоти вънити въ Илмерь езеро великое, из негоже езера потечеть Вълховъ, и вътечеть въ езеро великое Нево; и того езера вънидеть устие въ море Варяжьское; и по тому морю ити доже и до Рима, а отъ Рима прити по томуже морю къ Цѣсарюграду, а отъ Цѣсаряграда прити въ Понтъ море, въ неже вътечеть Дънѣпръ рѣка. Дънѣпръ бо потечеть из Оковьскаго лѣса, и течеть на полъдьне, а Двина ис тогоже лѣса потечеть, а идеть на полунощие, и вънидеть въ море Варяжьское; ис тогоже лѣса потечеть Вълга на въстокъ, и вътечеть седмиюдесятъ жерелъ въ море Хвалисьское. Тѣмь же из Руси можеть ити по Вълзѣ въ Българы и въ Хвалисы, и на въстокъ доити въ жребии Симовъ, а по Двинѣ въ Варягы, а из Варягъ до Рима, отъ Рима же и до племене Хамова. А Дънѣпръ вътечеть вь Понтьское море трьми жерелы, еже море словеть Русьское, по немуже училъ святыи Андрѣи, братъ Петровъ, якоже рѣша.

№ 3. Звичаї слов'яно-русів[3].

Имѣяху бо обычаи свои и законъ отьць своихъ и предания, къжьдо свои нравъ. Поляне бо своихъ отьць обычаи имуть кротъкъ и тихъ и стыдѣние къ снъхамъ своимъ и къ сестрамъ, къ матерьмъ и къ родителемъ своимъ, и снъхы къ свекръвамъ и къ дѣверьмъ велико стыдѣние имуща; и брачьныи обычаи имѣяху: не хожаше зять по невѣсту, нъ привожаху вечеръ, а заутра приношаху по неи, чьто въдадуче. А Древляне живяху звѣриньскъмь образъмь, живуще скотьскы, и убиваху другъ друга, ядуще вьсе нечисто, и брака у нихъ не бываше, нъ умыкаху уводы дѣвица. А Радимичи и Вятичи и Сѣверъ одинъ обычаи имѣяху: живяху въ лѣсѣ, якоже вьсякыи звѣрь, ядуще вьсе нечисто, и срамословие въ нихъ предъ отьци и предъ снъхами, и браци не бываху въ нихъ, нъ игрища межю селы, и съхожахуся на игрища, на плясания и на вься бѣсовьскыя пѣсни, и ту умыкаху жены собѣ, съ неюже къто съвѣщавъся; имѣяху же по дъвѣ и по три жены. И аще къто умьряше, творяху тризну надъ нимь, и посемь сътворяху краду велику, и възложаху на краду мъртвьца, и съжьжаху, и посемь, събьравъше кости, въложаху въ судину малу, и поставляху на стълпѣ на путьхъ, еже творять Вятичи и нынѣ. Сиже творяху обычая и Кривичи и прочии погании, не вѣдуще закона Божия, нъ творяще сами собѣ законъ.

№ 4. Зразки коротких звісток[4].

Въ льто 6506. Въ лѣто 6507.

Въ лѣто 6508. Преставися Малъфридь. Въ сеже лѣто преставися и Рогънѣдь, мати Ярославля.

Въ лѣто 6509. Преставися Изяславъ, отьць Брячиславль, сынъ Володимерь.

Въ лѣто 6510.

Въ лѣто 6511. Преставися Вьсеславъ, сынъ Изяславль вънукъ Володимерь.

Въ лѣто 6512. Въ лѣто 6513. Въ лѣто 6514.

Въ лѣто 6515. Пренесени си въ святую Богородицю.

Въ лѣто 6516. Въ лѣто 6517. Въ лѣто 6518.

Въ лѣто 6519. Преставися цѣсарица Володимеря Анна.

Въ лѣто 6520. Въ лѣто 6521.

№ 5. Смерть Володимира[5].

…Володимеру же разболѣвъшюся, въ сеже время бяше у него Борисъ. И Печенѣгомъ идущемъ на Русь, посъла противу имъ Бориса, а самъ боляше вельми, въ неиже болести и съконьчася мѣсяца иуля въ 15 дьнь. Умьре же на Берестовѣмь. И потаиша и, бѣ бо Святопълкъ Кыевъ. И нощию межю клѣтьми проимавъше помостъ, въ ковьръ обьртѣвъше и, ужи съвѣсиша и на землю, и възложьше и на сани, везъше, поставиша и въ святѣи Богородици, юже бѣ съзьдалъ самъ. Се же увѣдѣвъше людие, бес числа сънидошася, и плакашася по немь, боляре акы заступьника ихъ земли, убозии акы заступьника и кърмителя. И въложиша и въ кърсту мраморяну, и съхраниша тѣло его съ плачьмь, блаженаго кънязя.

№ 6. Про руських бранців, як їх ведуть у половецький полон[6].

…И воеваша мъного, и възвратишася къ Търчьскому, и изнемогоша людие въ градѣ гладъмь, и предашася ратьнымъ. Половьци же, приимъше градъ, запалиша и огньмь, и люди раздѣлиша, и ведоша въ вежѣ къ сьрдобольмъ своимъ и съродьникомъ своимъ мъного роду хрьстияньска: стражюще, печальни, мучими, зимою оцѣпляеми, въ алъчи и въ жажи и въ бѣдѣ, опусьнѣвъше лици, почьрнѣвъше телесы, незнаемою страною, языкъмь испаленъмь, нази ходяще и боси, ногы имуще събодены тьрниемь; съ сльзами отъвѣщеваху другъ къ другу, глаголюще: „азъ бѣхъ сего города“, и другыи: „а азъ сея вьси“, и тако съвъпрашахуться съ сльзами, родъ свои повѣдающе и въздышюще, очи възводяще на небо къ Вышьнему, съвѣдущему таиная.

№ 7. Любецький з'їзд[7].

…Въ лѣто 6605. Придоша Святопълкъ и Володимеръ и Давыдъ Игоревичь и Василько Ростиславичь и Давыдъ Святославичь и братъ его Ольгъ, и сънящася Любячи на устроение мира, и глаголаша къ собѣ, рекуще: „почьто губимъ Русьскую землю, сами на ся котору дѣюще? а Половьци землю нашю несуть розно и ради суть, оже межю нами рати; да нынѣ, отъселѣ имѣмъся въ едино сьрдьце, и блюдѣмъ Русьскыѣ землѣ; къжьдо да дьржить отьчину свою: Святопълкъ Кыевъ Изяславль; Володимеръ Вьсеволоже, Давыдъ и Ольгъ и Ярославъ Святославле; а имъже раздаялъ Вьсеволодъ городы: Давыду Володимерь, Ростиславичема Перемышль Володареви, Теребовль Василькови“. И на томь цѣловаша крьстъ: „да аще къто отъселѣ на кого въстанеть, то на того будемъ вьси и крьстъ чьстьныи“. И цѣловавъщеся, поидоша въ свояси…

№ 8. Снем на Долобському[8].

Въ лѣто 6611. Богъ въложи въ сърдьце къняземъ Русьскымъ мысль благу, Святопълку и Володимеру, и сънястася думати на Долобьскѣ; и сѣде Святопълкъ съ своею дружиною, а Володимеръ съ своею въ единомь шатьрѣ. И почаша думати, и начаша глаголати дружина Святопълча, яко „не веремя нынѣ веснѣ ити, хочемъ наша смьрды погубити и ролию имъ“. И рече Володимеръ: „дивьно ми, дружино, оже лошади жалуете, еюже тъ ореть; а сего чему не промыслите, оже начьнеть орати емьрдъ, и приѣхавъ Половьчинъ, ударить смьрда стрьлою, а лошадь его поиметь, а въ село его ѣхавъ, иметь жену его и дѣти его и вьсе его имѣние? То лошади его жаль, а самого не жаль ли?“ И не могоша отъвѣщати дружина Святопълча. И рече Святопълкъ: „брате, се язъ готовъ уже“. И въста Святопълкъ, и рече ему Володимеръ: „тоти, брате, велико добро сътвориши земли Русьстѣи“. И посъласта къ Давыдови и къ Ольгови, глаголюща: „поидѣта на Половьцѣ, да любо будемъ живи, любо мъртви“. И послуша ею Давыдъ, а Ольгь не въсхотѣ сего, вину река: „не съдравлю“. Володимеръ же, цѣловавъ брата своего, поиде Переяславлю, а Святопълкъ по немь и Давыдъ Святославичь и Давыдъ Вьсеславичь и Мьстиславъ, Игоревъ вънукъ, Вячеславъ Яропълчичь, Яропълкъ Володимеричь.

№ 9. Зразки коротких звісток[9].
…Въ лѣто 6612. Ведена бысть дъщи Володарева за цѣсаревичь за Олексиничь Цѣсарюграду, мѣсяца иулия въ 20 дьнь. Томьже лѣтѣ ведена Передъслава, дъщи Святопълча, въ Угъры, за королевичь, мѣсяца августа въ 21 дьнь. Томьже лѣтѣ приде митрополить Никифоръ въ Русь, мѣсяца декабря въ 6 дьнь. Тогоже мѣсяца преставися Вячеславъ Яропълчичь въ 13 дьнь. Тогоже мѣсяца въ 18 дьнь Никофоръ митрополитъ на столѣ посаженъ. Се же съкажемъ… Сегоже лѣта исходяща, посъла Святопълкъ Путяту на Мѣньскъ, а Володимеръ сына своего Яропълка, а Ольгъ самъ иде на Глѣба, поимъше давыда Вьсеславича. И не успѣша ничьтоже, и въвзратишася опять. И родися у Святопълка сынъ, и нарекоша имя ему Брячиславъ. Въ сеже лѣто бысть знамение: стояше сълньце въ крузѣ, а посредѣ круга крьсть, а посредь крьста сълньце, а вънѣ круга обаполы дъвѣ сълньци, а надъ сълньцьмь кромѣ круга дуга, рогома на сѣверъ; такоже знамение и въ лунѣ тѣмьже образъмь, мѣсяца февраля въ 4 и 5 и 6 дьнь; въ дьне по 3 дьни, а въ нощи въ лунѣ по три нощи.


——————

  1. А. А. Шахматовъ. Повѣсть временныхъ лѣтъ. Томъ I. Вводная часть. Текстъ. Примѣчанія. Спб., 1916; стор. 6, 8–9, 10, 11–12.
  2. Там-само, стор. 6–7.
  3. там-таки, стор. 12–13.
  4. там-само, стор. 163–164.
  5. там-само, стор. 164–165.
  6. там-само, стор. 283–284.
  7. там-само, стор. 299–300.
  8. там-само, стор. 323–324.
  9. там-само, стор. 326–327.